ليلة رأس السنة كان عندى ملل رهيب وكنت متشائم بشكل كبير وقرفان من عيشتى وهاطق من جنابى وأنا بلعب على النت وجدت صفحة أول حادث أنتحار وشوية كلام خرف فى خرف ونمت وأنا هاطق ,, صحيت تانى يوم فى أول أيام عام 2011 ميلادية وجدت بلوة غريبة ومفزعة طبعاً كلكم سمعتوا عنها وهى تفجير كنيسة للأقباط فى أسكندرية والله الواحد أتغاظ كثير وكنت فاكر أن الحادث سوف يمر زى أى حادث قبلة شوية أعتراضات وكلمتين من السيد / شنودة وخلاص !!! بينى وبين نفسى قلت هما الجماعة الأقباط موعودين بالحوادث فى المناسبات ,, العام الماضى بردة فى العيد بتاعهم حدثت بلوة فى الصعيد ومن شهر حدثت بلوة كنيسة العمرانية واليوم أسكندرية ,,, معداش كام يوم وفتحت النت على صباحية ربنا وجدت بلوة جديدة فى قطار سمالوط بطلها واحد فى البوليس أطلقوا علية مندوب شرطة وأنا مش فاهم يعنى أية مندوب شرطة هل يعنى عسكرى ولا صول ولا شاويش الله أعلم !!!
من يوم 1 / 1 / 2011 م . حتى اليوم والدنيا ظايطة والأقباط عاملين وقفات وأحتجاجات والأزهر راح يصالحهم والشعب قال نحن المسلمين سوف نعمل دروع بشرية حول الكنائس يوم 7 / 1 / 2010 م . يعنى يوم عيد ميلاد المسيحيين فى الشرق أو فى مصر ماهو العيد عندهم فى يوم مختلف عن أوروبا حاجة كدة لها قصة تانية مش وقتها دلوقتى !!! طبعاً الموضوع كبر وبهوق وخصوصاً أن رأس الأفعى التى وعدنا الرئيس بقطعها لسة لم يعثروا عليها بس اليومين دول لقوا نصف وش عملوا منة وجة بصحيح على الكومبيوتر حاجة كدة غريبة قالوا أنها قد تكون رأس الشخص الذى قام بالتفجير والغريبة أنهم بيقولوا وجدوها فوق سطح الكنيسة !!! مش عارف طارت لفوق إزاى !! كل يوم قصة شكل مرة الموساد مع أن الموساد كان مشغول بمولد أبو حصيرة ومش فاضى ومرة قالوا دية القاعدة ومرة جيش العراق الأسلامى ومرة قالوا دول أربعة أو خمسة من باكستان وأخر حاجة سمعتها على النت أنهم السلفيين بتوع الدقون . آة نسيت موضوع الشيخ السيد بلال الله يرحمة أهو واحد من السلفيين مات قتيل التعذيب فى القسم تحت ذمة التحقيق فى تفجير الكنيسة وسبحان الله مافيش واحد وقف علية وقفة واحدة ولا الأقباط زعلوا وعملوا وقفات ضد الحكومة رد جميل يعنى للدروع البشرية المسلمة !!! والله القصة طويلة ولسة لها كمالة مش عارفين أية هى ؟؟؟
أما عن قطار سمالوط فالحمد لله مطلعش سلفى ولا جهادى دة مندوب شرطة كان عندة شوية كهرباء زيادة فى مخة ومراطة طلعت عقبال عندكم على اليوتيوب وقالت أنة كان يعانى من نوبات صرع والحكومة قالت أنة مصاب بهلاوس عقلية !!!
بردة غريبة هى الأمراض النفسية بتيجى كدة زى العمل الرضى فى يوم وليلة طيب لما هو فسفس الشرطة مش طلعتة لية ومش عالجوة لية ومش شالوا السلاح منة لية ؟؟؟ المهم ملناش دعوة ومش عايزين نتكلم فى السياسة !!!
الظاهرة الملفتة لنظرى هى أن الأقباط أصبحوا بيتظاهروا لوكشة واحدة يعنى زمان لو حدثت نصيبة فى أسيوط بتوع أسيوط هما اللى يقوموا بالليلة أما الأن لو حدث نصيبة فى أسكندرية بتلاقيهم عاملين مظاهرات فى كل مصر فى العباسية والصعيد والقاهرة وأسيوط زى مايكون لموآخذة متفقين على كدة !!!
الحمد لله أحنا أحسن من الجزائر وتونس اللى الموت فيها على ودنة وأفضل بكثير من السودان اللى بتتقطع وأفضل من لبنان اللى على وشك حرب أهلية !!! أو ضربة من اليهود !!! طب وبعدين الحال بقى صعب قوى هى شوطة ولا فرة ولا عين وصابتنا نحن العرب !!! طب الجامعة العربية مش لها دور ولا أية لزمتها !!! ممكن نكمل بعدين ؟؟؟
ليست هناك تعليقات:
إرسال تعليق