بلوة أنقطاع الكهرباء التى حلت على المصريين وأتهامات متبادلة بين وزارة الكهرباء من جهة ووزارة البترول من جهة أخرى وأتهامات لمصدرى الغاز الطبيعى إلى إسرائيل وأتهام للشعب بعدم التدبر والأفراط فى أستهلاك الكهرباء وزير الكهرباء بيطلب شوية مازوت من وزير البترول بيقولة يحنن ماعندناش ... طب هات شوية غاز نكهرب بيهم المصريين بيقولة عدى علينا بكرة وسايبين الناس مقطعة نفسها هرش من حمو النيل .
طلع علينا واحد محافظ بيقول أن هذة البلاوى سوف تزيد من أجر الصيام وهذا بمثابة أنذار وأختبار من الله عز وجل لنا حتى نفوق لأنفسنا ولم يذكر أن الله سبحانة سوف يحاسب كل مقصر فى عملة وكل راعى عن رعيتة .
بلوة سرقة عمل فنى كبير لفنان هولندى كبير أسمة فان جوخ من متحف فنان كبير فنى نفسة فى مجال الفن ألا وهو الفنان محمود خليل وعَكْش وكيل وزارة ومعة أربعة تحت ذمة التحقيق ودة بعد يجى أسبوع من أفتتاح متحف أسلامى كبير بواسطة الوزير الفنان . بردة الكاميرات كانت متعطلة زى الكاميرات بتاعة البنك المركز لما أتلطش منة هبرة كبيرة من كام شهر ويمكن لسة ماركبوش كاميرات جديدة .
ظاهرة الحملات المؤيدة لجمال مبارك وأيمن نور والبرادعى وميت حملة وحملة مانعرفش مين اللى ممشيها وأحنا زى الطرش والصنج فى الزفة .
ظاهرة الوجوة المكررة التى علقت يفط أنتخابية غرقت الشوارع فى الريف والحضر ... مش عارف هما مش حاسين أننا مللنا وزهقنا من تكرار هذة اليفط بأسمائها .
السيد باشا أشترى جريدة الدستور ومش مكفية جريدة الوفد لية مش عارف ولكن البحر بيحب الزيادة .
الناس قاعدة تضرب أخماس فى أسداس وتنقد وتلوم وتقترح وتفكر وتتبنى وتتدبر ... كلنا بنتكلم على الحلول وعن المفروض وعن الذى يجب أن يكون .
غير بلاوى بيع جزيرة آمون وأراضى الدولة ومن كام شهر بلوة مياة النيل ومشاكل دول المنبع وعلى كل لون ياباطسطا زى مابيقول توفيق الدقن .
أكبر ظاهرة هى قدرة الشعب المصرى على التحمل .... ؟؟؟
